လူနာဦးစားပေး အဆင့်ခွဲခြင်း

လူနာဦးစားပေး အဆင့်ခွဲခြင်းး

စာရေးသူ - ဒေါက်တာလင်း

လူနာဦးစားပေးအဆင့်ခွဲခြားခြင်း ဆိုသည်မှာ လူအစုလိုက် အပြုံလိုက် တနည်းအားဖြင့် လူနာ တဦးတယောက်ထက် ပိုသော ထိခိုက်မှုများတွင် အရေးကြီးသော လူနာများ (သေရေးရှင်ရေးကို မိနစ်ပိုင်းအတွင်း ပြောင်းလဲသွားနိုင်သော လူနာများ) ကို လိုအပ်သော အရေးပေါ် စောင့်ရှောက်မှု ရရှိစေရန် ရည်ရွယ်ပါသည်။ 

အထူးသဖြင့် ကုသမှု ပေးနိုင်သည့် အရင်းအမြစ်နှင့် လူနာအရေအတွက် မျှတမှု မရှိသည့်အခြေအနေ (ဥပမာ။ ဆေးအကူ မလုံလောက်ခြင်း၊ လူနာတင်ယာဉ် မလုံလောက်ခြင်း စသည့် အခြေအနေများ) တွင် လူနာဦးစားပေး အဆင့်ခွဲခြင်းသည် အရေးကြီးသည့် အခန်းကဏ္ဍ၌ ပါဝင်ပါသည်။ 

လူနာဦးစားပေး အဆင့်ခွဲခြင်းမှာ နီဝါစိမ်း ဟု မီးပွိုင့်အရောင်နှင့်တွဲ၍ မှတ်နိုင်ပါသည်။

❤️ အနီရောင်အဆင့် (Red) ❤️

အနီရောင်အဆင့်ဆိုသည်မှာ ကုသမှု တခုခုကို မိနစ်ပိုင်း/ နာရီပိုင်းအတွင်း မရရှိပါက သေဆုံးနိုင်သည့် လူနာများကို ရည်ရွယ်ပါသည်။ ထိုလူနာများကို အရေးပေါ် ကုသမှု ပေးပြီးပါက အရေးပေါ် ခွဲစိတ်ကုသမှုပေးနိုင်သော ဆေးရုံများသို့ အမြန်လွဲပြောင်း ပို့ဆောင်ရန် လိုအပ်ပါသည်။ နမူနာအားဖြင့်

၁။ အရေးကြီးသော အင်္ဂါအစိတ်အပိုင်းများဖြစ်သည့် ဦးခေါင်း၊ လည်ပင်း၊ ရင်ဘတ်၊ နောက်ကျော၊ ဝမ်းဗိုက်၊ ခါး စသည်တို့တွင် ပြင်းထန်စွာထိခိုက်ထားသော လူနာများ (ဥပမာ။ ။ကျည်မှန်ခြင်း)

၂။ ခြေ၊ လက်များ အပြင်းအထန် ထိခိုက်မိပြီး သွေးမတိတ်သော လူနာများ (ဥပမာ။ ။ ခြေလက် ပြတ်တောက် ကြေမွသွားခြင်းများ)

၃။ သတိမေ့နေသောသူ ၊ အသက်ရှူနှုန်း ၁ မိနစ် အတွင်း ၁၀ ကြိမ်အောက် (သို့မဟုတ်) အကြိမ် ၃၀ ထက်မြန်နေသောသူ

💛 အဝါရောင်အဆင့် (Yellow) 💛

နာရီပိုင်းအတွင်း ဆေးရုံဆေးခန်းသို့ ပို့ဆောင်ကုသရန် လိုအပ်သော လူနာများဖြစ်ပါသည်။ နမူနာအားဖြင့်

၁။ ခြေ (သို့) လက်တွင်ကျည်မှန်သော်လည်း အလွန်အမင်း သွေးမထွက်နေသော လူနာ။

၂။ ဦးခေါင်းထိခိုက်သော်လည်း ခေါင်းမကွဲသည့်လူနာ

၃။ အကွာအဝေးတခုမှ ရာဘာကျည်ထိမှန်သော လူနာ

၄။ ခြေလက်များတွင် အနီးကတ် ရာဘာကျည်မှန်သော လူနာ

၅။ ထိခိုက်မှုကြောင့် ခြေ/လက် အရိုးများ ကျိုးသည်ဟု သံသယရှိသော်လည်း ထိုနေရာရှိ အရေပြား ပွင့်ထွက်ပေါက်ပြဲခြင်း မရှိသည့် လူနာ

၆။ ထိခိုက် ဒဏ်ရာများရှိနေသော်လည်း အသက်ရှူနှုန်း ပုံမှန် သတိကောင်းစွာ ရနေသေးလျှင်လည်း အဝါရောင် အဆင့်ဖြစ် သတ်မှတ်၍ စောင့်ကြည့် ကုသပေးရမည်။ 

💚 အစိမ်းရောင်အဆင့် (Green) 💚

ကျွမ်းကျင်သော ရှေးဦးသူနာပြုစုသူ၊ အခြေခံကျန်းမာရေးဝန်ထမ်း၊ သူနာပြု၊ ဆရာဝန် စသည် နားလည်တတ်ကျွမ်းသူ တဦးဦးမှ ကုသမှု ပေးနိုင်ပါက ဆေးရုံဆေးခန်းသို့ လွှဲပို့ရန် မလိုအပ်သော လူနာများ၊ နားလည်တတ်ကျွမ်းသူ တဦးဦးမှ ကုသမှု မပေးနိုင်ပါကလည်း အခြေအနေများ တည်ငြိမ်ပြီးမှသာ ဆေးရုံဆေးခန်းသို့ ပို့ရန် လိုအပ်သော လူနာများ ဖြစ်ပါသည်။ နမူနာအားဖြင့်

၁။ သာမန် အရေပြား ပွန်းပဲ့ဒဏ်ရာများ (ဦးခေါင်းမပါ)

၂။ အဆင့် ၁ အပူလောင်ခြင်း

၃။ အရိုးမကျိုးသော အဆစ်အမြစ် နာကျင်ခြင်းများ (ဥပမာ။ ။ ခြေကျင်းဝတ် ခြေဆစ်လည်ခြင်း)

🖤 အနက်ရောင်အဆင့် (Black) 🖤

ကုသမှု ရရှိသည်ဖြစ်စေ မရရှိသည်ဖြစ်စေ ဧကန်မုချ သေဆုံးနိုင်သည့် လူနာများ သို့မဟုတ် မတော်တဆမှု/အကြမ်းဖက် ဖြစ်စဉ်အတွင်း သေဆုံးပြီးဖြစ်သည့် လူနာများ ဖြစ်ပါသည်။ 

🚨🚨🚨

အခြေအနေတည်ငြိမ်မှု မရှိပါက လူနာကောက်မည့်သူများ အနေဖြင့် ဤလူနာများကို သက်စွန့်ဆံဖျား မကောက်ရန် မေတ္တာရပ်ခံပါသည်။ 

လူနာကောက်မည့်သူများ / ရှေးဦးသူနာပြုစုသူများ အသက်အန္တရာယ်ကြုံရပါက ကယ်တင်နိုင်သည့် rescue team အရေအတွက် လျော့နည်းသွားနိုင်သောကြောင့် နောက်ထပ်ကယ်တင်ရမည့် လူနာများပါ သေဆုံးနိုင်သည်ကို သတိပြုသင့်ပါသည်။ နမူနာအားဖြင့်

၁။ ကျည်မှန်ပြီး ဦးခေါင်း ပွင့်ထွက်သွားသူများ။

၂။ နှလုံးနေရာသို့ ကျည်မှန်သူများ။

မှတ်ချက်။ ။ ရင်းမြစ် (resources) များ မလုံလောက်သော အခြေအနေတွင် အနက်ရောင်အဆင့် လူနာများထက် အနီရောင်အဆင့် လူနာများကိုသာ ပို၍ ဦးစားပေးကောက်ရန် နှင့် ဆေးရုံသို့ ဦးစားပေးပို့ဆောင်ရန် အရေးကြီးပါသည်။ 

ထိခိုက်လူနာများကို ကယ်ထုတ်ရာတွင် သတိထားသင့်သည့်မှာ 

၁။ scene safety  

၂။ self safety 

၃။ survivor safety ဖြစ်ပါသည်။

သူရဲကောင်း ပြည်သူအပေါင်း ဘေးရန်ကင်းကြပါစေ

🙏🙏🙏

 'A Yay Paw' mobile application ကို ဒေါင်းလုပ် ရယူနိုင်ပါပြီ။ Application ကို သွင်းထားပြီးလျှင် internet မရှိလည်း အသုံးပြုလို့ ရပါတယ်။

http://onelink.to/ayaypaw

Page : https://www.springrevolution.xyz

Telegram channel: https://t.me/ayaypaw